ذاكرتي الله يرحمها

زي العنوان كده بالضبط
عندي سنين فيهم ضباب
تكاثرت علي فيهم الأحداث 
ويادوب رجعت أعيش السنة اللي فاتت
خبطات متواليات وأنا جمل الحمد لله
طبعا بركت في الأخر وجبت جاز..ودخان اسود ووش سلندر
بس الحمد لله من سنة قمت..قلت ها اقوم..وربنا أعانني وقمت
من سنة ابتديت أشوف الدنيا ألوان
كل ما قبلها كان ابيض واسود ولكن أغلب البشر لا يعلمون
بصراحة..كل البشر لا يعلمون..ولا يشعرون..ولا حتى أقرب المقربون
طالما إنت واقف على رجلك
تأكل - تشرب - تعمل -  - تهزر - تستحمل..تبقى انت فل وميت فل واربعتاشر تكون ميت فل وخمستاشر
مش عارف مشيت إزاي آخر ست سنين...س مش ده اللي تاعبني
اللي عامل لي خرم في دماغي ........ انها اتخرمت!!
صفاتي اتغيرت كتير..مش عاجبني تغيراتها ولكنها تغيرات غير مردودة
الضحك الكتير بقي قليل .
انا أسف يا ذاكرة..راحت عليكي يا زوزو