مستشفى المجانين

ابتسم فأنت فى مستشفى المجانين
لما السيسى يؤيد الضربه الجويه الامريكيه لمطار الشعيرات فى سوريا و يؤكد ان الضربه اختراق لدولة ذات استقلال ابتسم فأنت فى مستشفى المجانين
لما الازهر يطلع بيان يقول فيه ان المسيحيين اللى بيموتوا فى التفجير شهداء و لما مفتى مصر يطالب بقانون يعاقب الشامتين فى قتلى التفجيرات ابتسم فأنت فى مستشفى المجانين
لما الجيش اللى المفروض يحمى تراب مصر يطعن فى الحكم اللى بيقول ان الجزر مصريه و يقدم اوراق تثبت انها غير مصريه ابتسم فأنت فى مستشفى المجانين
لما داعش تتبنى تفجير الكنايس و تقول على منفذى التفجير بالاسم و تلاقى الاعلام و السياسويه بيطالبوا باعدام الاخوان فى السجون ابتسم فأنت فى مستشفى المجانين
لما احمد موسى يطالب باعدام اى حد يفجر نفسه فى كنيسه او فى مكان عام و حيوي ابتسم فأنت فى مستشفى المجانين
لما الحجر الصحى يوافق على دخول شحنة فول مسوس لمصر و يقول ان السوس ميت و مفيش منه مشكله ابتسم فأنت فى مستشفى المجانين
لما على عبد العال رئيس البرلمان المصرى يوافق على حالة الطوارئ بدون حضور الاعضاء و ينتهك الدستور ابتسم فأنت فى مستشفى المجانين
لما مرتضى منصور يطالب باعتقال عائلات الهاربين خارج مصر و التنكيل بهم حتى عودة الهاربين و اعدامهم ابتسم فأنت فى مستشفى المجانين
لما تعرف ان فيه 90 مليون متخيلين ان فيه 800 الف عسكرى هيقدروا يعتقلوهم و يسجنوهم و لما تعرف ان فيه 90 مليون مقتنعين ان الداخليه هتقدر تراقب الفيسبوك و تويتر و مواقع التواصل بالكامل ابتسم فأنت فى مستشفى المجانين
ابتسم يلا لان انت عايش فى مستشفى المجانين

يا ريس

بص يا ريس انا عارف انك مكنتش طمعان في الحكم ولا كنت بتتآمر انت والمجلس العسكري ولا خلعت مرسي وواثق تماما إن يوم 30/6 كانت مظاهرات عفوية ضد الاخوان ومش مدبرة
وأنك حميت البلد وانك زي ما قلت اننا نور عينيك ومصر اوووم الدنيا وهتبقي ااااد الدنيا
بس اللي حصل ان الشعب طلع غبي ومش فاهمك ولا يستاهلك تحكمه.
ياريت بقي يا ريس لو سمحت يعني تسلمنا البلد تاني بس بالدولار ابو 7 جنيه.
وبالجزيرتين تيران وصنافير .
وبالديون الخارجية اللي كانت 35 مليار دولار مش 67 مليار وبالدين الداخلي اللي كان ترليون مش 4 ترليون .
وبال٣٠ مليار دولار مساعدات الخليج اللى جولك بعد 30/6 وماتقلقشى عليهم هنبنى بيهم مصانع تشغل الشباب .
وترجعلنا الشباب اللي ماتو سواء مدنيين او عساكر وضباط .
وترجعلنا العدس ابو ١٤ والفراخ ام ١٥ واللحمة ام ٦٥.
والسكر ابو ٤ والرز ابو ٣ والزيت ابو ٩ .
وياريت كمان يا برنس تلغي اتفاقية عنتيبي مع اثيوبيا ! احنا عاوزين نعطش متشغلش بالك.
وتلغي اتفاقية ترسيم الحدود البحرية اللي طارت فيها حقول البترول المصرية وراحت لقبرص احنا هنعرف نرسمها متخفش علينا .
وترجع لفرنسا الكام طيارة رافال ( أغلى طائرة فى العالم و ثمنها 100 مليون دولار ) وكفاية علينا ال 16 - F احنا ناس دقة قديمة و مش وش نعمة.
و حاملات الطائرات الفرنسية الميسترال اللى ثمنها 3 مليار دولار اللى ممكن بصاروخ أكسوزيست صناعة فرنسا برضه ( ثمنه مليون دولار بس ) تتضرب فى ثانية ويبقى بخ في قاع البحر .
آه وبالمرة كدة تفكنا من القناة الجديدة وتردمها تاني وترجعلنا 8 مليار دولار وكفاية علينا القناة القديمة والقرشين اللي بتجيبهم احنا اصلا شعب غاوي فقر وكمان لانها مانع مائي ضخم جيشنا مش هيعرف يعبره لو اسرائيل احتلت سينا تانى إنت يا برنس رجل عسكري وفاهم الكلام ده .
اما بالنسبة بقي لمشاريعك الجهنمية اللي بتخاف عليها من الاشرار زي مشروع المزارع السمكية بتاع الجمبري ياريت تلغيها احنا شعب معدته واخدة ع الفول والطعمية والكشري ومنعرفش شكل الجمبري كتر الف خيرك ونوفر الكام مليار بتوعهم يا برنس .
وياريت كمان ياريس تلم سبوبة عربيات الخضار واللحمة بتاعة الجيش وكفاية علينا وقوفنا طوابير على مجمعات وزارة التموين وأهو الجيش يركز فى شغله فى سينا .
والمفاعل النووي اللي روسيا هتعملة بقرض طويل الاجل 26 مليار دولار ياريت يا برنس يتلغي هو كمان احنا شعب بنغرق وبنتكهرب من شوية مطر لإن البنية التحتية متهالكة مش ناقصنا مفاعل نووي يمحينا من ع الخريطة والشمس طاقة نظيفة ومستدامة وأرخص من النووي كمان .
اة وبالمرة يا ريس وانت ماشي تبقي تروح البنك هنرجعلك تحويشة عمرك اللي كنت اتبرعت بيها اول اسبوع مسكت البلد خليهم معاك تصرف منهم.
وبالنسبة لقرض صندوق النقد تبقي رجع للناس فلوسها دي حتي فلوس منظورة ومش محتاجينها وحرام شرعاً .
وياريت ياريس تلم لجانك الاليكترونية من عالفيس لإن الناس فهمت وعرفت كل حاجة واهو نوفر فلوسهم لحاجة مفيدة كمان.
وحاجة اخيرة يا ريس ياريت كمان وانت ماشي تبقي تاخد معاك الارهاب المحتمل في ايدك عشان ملهوش مكان في مصر من بعدك