الفار طلع له شنب وأنثى العوكش .. يومين و تربي دقنها

أكيد فيه حاجة أنا مش عارفها .. مش ممكن الفار فجأة يعمل أسد .. ويبرق عينيه لناس تقيلة أوي إلا إذا كان مسنود من ناس أتقل .. فالمدعو توفيق عكاشة يتصدر الآن واجهة المشهد الإعلامي ، مش لأنه جاء بسبق لم يسبقه أحد إليه.. أو أنه عرف أخيرا ما خفي علينا لسنوات غير قليلة ، لكن لأنه فقط بيخبّط في الحلل ، ويهزي هزيان اللي اتسكع على قفاه سكعة ميري محترمة ، وتذكر فجأة انه من حيث التكوين والرقم القومي راجل ، فلابد له على الأقل قصاد مراته وعياله يعمل فيها أبو زيد زمانه،  وانه مش همه التخين سواء كان المشير أو مرسي.

الافندي لسه مصمم ان الانتخابات تم تزويرها لصالح مرسي وبيقولها بالفم المليان : أيوه الانتخابات مزورة .. طيب إيه مصدرك ياتيفة ؟ .. شوفوا بقى الرد : أنجيلا ميركل رئيسة وزراء ألمانيا اتصلت به وقالت له : الانتخابات يا تفتف حيتلعب فيها .. مصدقش الراجل قام إيه اتصل بواحد إسرائيلي ذي حيثية فقال له : امريكا عايزة مرسي يقعد ع الكرسي وبعتت صابونة صناعة أمريكية لشفيق تزحلقه لحد ما يروح ابو ظبي ومنها على لندن ومش راجع تاني.
يعني احنا طلع عين اللي خلفونا وقبل الإعلان بدقيقة مش عارفين مين اللي حينجح .. وتيفة باتصالاته الأوربية الإسرائيلية عرف قبلنا كلنا .. ولأنه مصري أصيل وأمه صاحبة قناة الفراعين .. يعني هى كمان مصرية أصيلة وجايز تطلع نفرتيتي أختها وكليوباترا عمتها ويبقى تيفة بجد فرعون من سلالة فرعونية تعود أصول اهله واللي خلفوه الى مينا موحد القطرين.
عشان كده استعيب أوى انه يفضل فار صغير ويعلن خوفه وجبنه من الإخوان لو مسكوا الحكم ، وانه حيسيب البلد أحسن مرسي ينفخه في ميدان التحرير ، أو يخصيه ، فيبقى قاعد مع بريتني سبيرز وعينه حتطلع عليها .. لكن منين يا فرج .. ابيض ياورد .. ياريت كان فيه .. انا وانت واحد ياحبيبتي.
 الفار طلع له شنب وقال لك لازم أبيّن العين الحمرا وابان ولو لمرة واحدة في حياتي إني راجل ودكر وفلاح فصيح .. فراح فاتح صدره وضرب في الكل .. المجلس العسكري وعلى رأسه المشير والإخوان المسلمين ومرسي اللي هو دلوقتي رئيس مصر .. هه .. وانا يهمني رئيس على نفسه .. مادام انا منتخبتوش يبقى رئيس مزوّر .. انا انتخبت شفيق مع اني معرفوش .. بس هما قالوا لي انتخب شفشق .. وقبلها جاءته أوامر عليا انزل العباسية واهتف لعمر سليمان فقال لهم سمعا وطاعة .. قالوا له افتح النار على الإخوان وهو ميعرفش يعني إيه إخوان ، فأخد كام حصة شرحوا له فيها تاريخهم .. وبرضه مفهمش .. لكن بسيطة عايزني اقول عليهم وحشين وكخه .. بسيطة .. وولاد كلب كمان.
تيفة امبارح " اصل بقيت مدمن الفرجة عليه " قال بالحرف : انا صحيح هاجمت المجلس العسكري بس مش معنى كده اني مش بحبه .. احنا عيلة واحدة ولو الواد زعل من أبوه بيعمل إيه ؟ .. بيخصمه .. عشان كده انا مخاصم المجلس العسكري ومش حالعب معاه تاني عشان قال لي انا جايلك بالليل وجهّزت نفسي واداني بومبة .. بس هو حبيبي " أخصمك اه .. أسيبك لا " .. كمان هو زعلان من المجلس لأنه دعاه اكتر من مرة انه يجي الفراعين بما أنها الأعلى مشاهدة  بين فضائيات العالم ، وان حياة الدرديري انثى العوكش فاق عدد مشاهديها عدد مشاهدي اوبرا وينفري في عز مجدها .. فالمجلس رفض وفضّل يروح لمنى الشاذلي في دريم ويسري فوده وريم في اون تي في ، وقال لتيفة : انت " بتاعي "  اه .. بس مش لدرجة أهين نفسي واظهر معاك على شاشتك المعفنة .. تعرف يا تيفة شفيق سقط ليه؟ .. لأنه اتجنن في عقله وسمع كلامك وجه معاك مرتين .. جبت داغه يا بن الهرمة وقضيت عليه .. ولو حد جاب له سيرتك دلوقتي حيركبه مليون عفريت لأنه سمع كلامك .. وقاعد دلوقتي في ابو ظبي مفيش على لسانه غير حاجة واحدة بيقولها : صحيح على رأى المثل " اللي يمشي ورا العيال ميسلمش م " .... " !
أرجع واسألك يا تيفة : مسنود على إيه بالضبط ، ومهربتش ليه زي ما قلت بعد مرسي مابقى رئيس .. هو الفار طلع شنب؟ .. طيب وإيه يعني دول يا دوب كام شعرة ، ولو شاف قطة مش قط حيسخبى في اى بلاعة.. وأخيرا حيكتشف ان القطة أليفة وحنيّنة ومش حاطة الفار في دماغها من أساسه .. وساعتها حيعرف ان الخوف جوّاه ، فيرجع لأصله تاني ويشوف مين اللي ع الكرسي ويسبّح بحمده .
طوّلت عليك يا تيفة .. ونسيت اختك حياة الدرديري " الشغالة "  عندك .. اللي لسه زعلانة مني عشان قلت عليها مرة انها ناقصها شنب وتبقى راجل صايع .. لسه الجلالة واخداها .. ولسه بتتكلم بصباعها اللي اكبر من صباع المحشي البدنجان ، وبتتحدى الريس مرسي " شوف الجرأة " وتؤكد انه نجح بالتزوير .. هى كمان مسنودة عليك ، ومش عارفه انت مسنود على مين .. بس خلاص مادام شافت انك مش همك حد ، قالت اكيد هو واثق من نفسه .. هو فار صحيح وانا عارفه .. بس شنبه طلع .. وعندما تكتشف الست حياة الحقيقة المرة وان مرسي فعلا هو الرئيس والإخوان جايين جايين يبقى تيفة حيتحجب وهى تربي دقنها .. ومش قضية كبيرة على فكرة ، فواضح ان الدرديري هرمونات الذكورة عندها نشطة جدا ، فيومين .. أسبوع بالكتير حتلاقي دقنها كبرت وتدخل تحت عباية الإخوان .. ولو معرفتش تتحكم في حكاية الهرمونات ديه وزادت معاها أوي تقلب راجل وخلاص .. صحيح حيبقى راجل مسخة ، بس اسمه راجل .. بدل ماهى محسوبة غلط على صنف الحريم.
وفي الاخر حاقولك يا تيفة انا زهقت من الكتابة عنك وعن انثى العكش وحاسس اني اخرتي مستشفى المجانين .. وان الحال حيوصل بيا ان الاقي نفسي في ميدان العباسية او المنصة بهتف وراك وورا مصطفى " بدري " : يا مشير يا مشير .. سيتنا ليه في المنصة ورحت تجري ع التحرير!

أبوس إيدي شعر ودقن

الثورة المصرية عظيمة. وانا بحبها اوي عشان حبيت عظيمة بنت خالي عبعظيم 
لأنها كشفت عن شخصيات مصرية رائعة ونادرة  وانا شخصيا متابع جيد لكوميديا الثورة وكوميديانات الثورة عشان بطبعي مش غاوي نكد وبحب البهرجة والانبعاج اللي بيفشلئللي بؤي
  المهم يعني خد عندك شخصيات زي الاسطى زلطة وتوفيق عفاشة وباسم يوسف والشيخة الشريفة ماجدة وعند دي وهنربط الحمار ونوقف التوكتوك
 الشيخة ماجدة لمن لا يعرف -وهم قليل- معالجة بالقرآن الكريم.. وهي صنعة يتخفى وراءها كثير من الدجالين والمشعوذين ومسخري الجن لكن هنركن الجن علي جمب بين الحمار والتوك توك عشان اللي بتقولة الشيخة  الشريفة ماجدة ان الانس هواللي جنن الجن --أحب أن أحمد ربنا وأشكر فضله وأبوس إيدي شعر ودقن لانة مازال فية شخصيات قادرين يضحكوني في وقت ما اصعبة الضحك
 المهم يعني الشريفة الشيخة ماجدة أوعى تزهق من ذكر الاسم الثلاثي، فهي  كلها قطعية واحدة مش هينفع تتفك وهتاخد وقت على ما نعرف نفصصها، سيبيها شوية في درجة حرارة المطبخ وبعد ما تفك شيل  "الشريفة" لوحدها و"الشيخة" لوحدها و"ماجدة" لوحدها وبعدين احرقهم التلاتة في الفرن!!  ودايما لما بتزكر اسم المخلوع  بتقول مبارِك بكسر الراء  ولو تفتكر ايام الثورة كانت بتقول أن من قتل المتظاهرين هم إيران وحزب الله وفلسطين وقطر وبعض الشيعة العراقيين (بس نسبة قليلة يعني من الشيعة العراقيين عشان الخلطة ما تعجنش)..يبدو أن التجليات النورانية قد رفعت الحجاب عن عيون الشيخة ماجدة لأنها شريفة بنت شريف فرأت الجريمة كاملة، وقعدت لا بيها ولاعليها في المكان الصح  في ميدان عبد المنعم رياض يوم 28 يناير وهو اليوم الذي لم ينزل مصري من بيته إلا إذا كان ضد مبارك أو ضد من ضد مبارك، ولكنها كانت واقفة كده في ميدان عبد المنعم رياض بتفكر بصت يا اخويا لقت مجموعة رجالة لابسين لبس شرطة  ودي حاجة غريبة طبعا يومها كلنا عارفين إن ما كانش فيه شرطة خالص في الوقت ده  بصت  من تحت النضارة الروحانية بتاعتها  وقالت إيشي خيال يا ناس.. إنتم مين يا أخويا؟ قام رد عليها واحد إيراني شكله أهبل  بيخر من أول سؤال قال لها إحنا مش شرطة يا حاجّة  ده إحنا إيرانيين وحزب اللهويين وفلسطينيين وقطريين وبعض شيعة عراقيين جايين نساند الثورة يا حلاوته يا حلاوته.. وبعدين وهو واقف قدامها بيكلمها قعد يشاور للرجالة اللي معاه  اللي لسه جايين من المطار  وقال لهم يلا يا ابني إنت اطلع العمارة دي، وانت اطلع العمارة دي، نشنوا كويس.. يلا نساند الثورة، وطلعوا الكلاشينكوف وبنادق القناصة واتمركزوا  فوق سطوح العمارات وقعدوا يساندوا الثورة. نسيت اقولكم انها بتقول ان سوزان من الاشراف ومبارك بكسر الراء برضك من  نسل رسول اللة

أتوجه بنداء للشيخة ماجدة وكل الأشراف آل البيت ونسل النبي عليه الصلاة والسلام.. بأن أبا لهب كان عم النبي صلى الله عليه وسلم..  وامرأة لوط وامرأة نوح كانتا تحت عبدين صالحين فخانتاهما.. فالعبرة بالعمل لا بالنسب.. "إنه ليس من أهلك إنه عمل غير صالح

وروحي ياشيخة وابقي تعال بسرعة

عظيمة يا مصر.. يا أرض القرع والزلابية والبطيخ!!!

غمض عينيك وامشي بخفة ودلع .. الدنيا هى الشابة وانت الجدع .. تشوف رشاقة خطوتك تعبدك .. لكن انت لو بصيت لرجليك ... تقع.

ووقعنا كلنا ، عشان بصينا تحت رجلينا .. مشينا بخفة ودلع .. وسامحوني " بعلوقية " .. كمان مرة ساموحني .. بس لا كنا جدعان ولا زفت ، ولا مشيتنا رشيقة ولا هباب .. ووقعنا زي الخرفان في يد من لا يرحم .. بس العيب في مين ؟ .. قال يا فرعون إيه فرعن أمك .. قال مالقيتش حد يصدني ويلمني ويوقفني عند حدي .. ضحكت ع الكل ، ولعبت بيهم الكورة ، وجبت الجون ، وحارس المرمي ابن كلب أهبل .. الشوطة مش جامدة للدرجة دي وكان ممكن يمسكها بسهولة .. بس هو عايزها تدخل فيه .. معزة ومحبة للي شاطها .. معقولة نحرجه .. ده كبييير .. وبصراحة " لعيييب " .. سجّد الكل ، وشغلنا بمليون حاجة ، وسقى الدفاع حاجة أصفرة ، فدخلوا في بعض بدل مايقفوا قصاد المهاجم .. اتلخبط الجون .. ضرب لخمة .. جات له الكورة معرفش يمسكها .. ومش زعلان البيه الخايب .. ماهو مش اى حد اللي شاط .. ده المعلم الكبير.
شوفوا بقى أكيد فيه حد فينا حمار .. ماهو مش ممكن كبار فقهاء القانون يكونوا مش فاهمين قانون ، وبناء عليه قالوا قانون العزل أمر واجب ، وإحالته من اللجنة الرئاسية للدستورية العليا مخالف مخالفة لا تخفى على طالب في أولى حقوق .. وقالوها صراحة: تحايل صارخ على القانون.. ومنهم من قال بألم شديد : عيب اللي بيحصل ده .. إهانة في حق القضاء المصري العظيم ان قضاة ومستشارين كبار يسمعوا الكلام وينفذوا الأوامر .. والكل كان منتظر الفرج من الدستورية العليا فيما يخص الفريق شفيق .. قامت المحكمة قالت لك شفيق يستمر والبرلمان يتحل .. نص العمى ولا العمى كله .. متعرفش بقى العليا ان العمى كله كان في استمرار شفيق .. صحيح البرلمان انحل وده ريّح ناس كتير .. لكن ادي دقني اهى ان ما رجع الحزب الوطني تاني واخد الاغلبية وحيرجع زمن مبارك أسوأ مما كان .. وخلي مرسي يحلم براحته .. وحياة أمي ورحمتها .. شفيق هو اللي جي .. لأ وإيه .. بالصناديق!!!
وحنقعد نغني : لا هى باظت ولا خربت ولا جابت جاز لا مؤاخذة .. دي عيشة ظريفة جدا .. ولا فتنة انضرمت ولا حد بيشتكي لحظة .. ماشية والاشية معدن .. عايشين في حرية .. زمن القيود اختفى .. اتحدى لو واحد يوم انضرب بالقفا .. والناس بتختشي ولا حد بيرتشي .. الله على الحياة .. بقى لونها شفتشي .. ده احنا لا صوتنا اتنبح.. ولا في مالطة بندن.
كله راجع تاني .. وبأسرع مما تتصوروا.. محدش يستبعد اللواء حسن عبد الرحمن بتاع أمن الدولة يبقى وزير الداخلية .. والعادلي بعد البراءة في الاستئناف يبقى مستشار امني ماحصلش .. وجمال مبارك بعد ما يخرج من قضية البورصة يبقى وزير مالية .. وعلاء أخوه وزير سياحة او اسكان او اى هباب ازرق .. ومبارك الله يرحمه كان راجل طيب واحنا اللي ظلمناه وجينا عليه وجرحناه .. أصلنا ولاد كلب مالناش في الطيب نصيب .. وسلم لي على الكوسة والزلابية والبطيخ والكنتالوب وقرع العسل .. وغنوا معايا غنوا .. وقولوا ورايا قولوا .. كتر يارب في اعيادنا .. واطرح فيها البركة وزيد .. جانا شفيق اهو جانا شفيق!!

ونرجع لمرجوعنا .. الماتش إياه .. واحد – صفر .. لأ .. واحد ايه .. قول اتنين تلاتة عشرة .. والماتش لسه ماخلصش والحكم ماصفرش .. ولسه فيه وقت بدل ضايع .. يعني فيه أمل .. بس عشرة صفر .. حنقدر نعوّضهم؟ ازاى والجمهور نفسه مش عايز يشجع؟ .. جمهور زهقان ومحبط وقرفان " طالع ميتين أمه " .. ادي اللي اخدناه من الثورة .. خد لك جنب وسيب الكبير يحكم مادام انت معرفتش تحكم .. كانت الكورة في ايدك .. سيبتها ليه .. جي دلوقتي تعيط .. براحتك ع الأخر.. عيّط واملى البحر اكتر ماهو مليان .. وسلم لي ع البدنجان.

قوانين بالفتة

اذ فجاءة اصبح معظم المصريين  مفتيين في اللي يجوز واللي مايجوزشي  بالرغم ان عندنا مفتي واحد بس ودار واحدة بس للافتاء كل يوم يطلع علينا نطع او ربما لطخ وان جاز التعبيير لطخ مستنطع  يقولنا لا يجوز تطبيق قانون العزل لانة غير دستوري  لايجوز الحكم علي شفيق لانة فريق لا يجوز الطعن عالاستنخابات عشان الديموقراطية وحرية ام عبير وكان القوانين اللي بيفلقونا بها نازلة من السما مش قوانين وضعية حطها بشر او انسان زيينا   ياسادة يابتوع القوانين ياساسة يابتوع السياسة كل القوانين الوضعية قابلة للتعديل طالما خرج جموع الشعب يطالب بتعديلها  انا مؤمن ومتيقن ان السياسة مهنة يتربح منها من يمتهنها وبيكوش من وراها  لكن من يتربح من وراء دماء سالت واروا ح زهقت  ويريد ان يعتلي كرس عرش مصر  هنقولة حسبنا اللة ونعم الوكيل