عظيمة يا مصر.. يا أرض القرع والزلابية والبطيخ!!!

غمض عينيك وامشي بخفة ودلع .. الدنيا هى الشابة وانت الجدع .. تشوف رشاقة خطوتك تعبدك .. لكن انت لو بصيت لرجليك ... تقع.

ووقعنا كلنا ، عشان بصينا تحت رجلينا .. مشينا بخفة ودلع .. وسامحوني " بعلوقية " .. كمان مرة ساموحني .. بس لا كنا جدعان ولا زفت ، ولا مشيتنا رشيقة ولا هباب .. ووقعنا زي الخرفان في يد من لا يرحم .. بس العيب في مين ؟ .. قال يا فرعون إيه فرعن أمك .. قال مالقيتش حد يصدني ويلمني ويوقفني عند حدي .. ضحكت ع الكل ، ولعبت بيهم الكورة ، وجبت الجون ، وحارس المرمي ابن كلب أهبل .. الشوطة مش جامدة للدرجة دي وكان ممكن يمسكها بسهولة .. بس هو عايزها تدخل فيه .. معزة ومحبة للي شاطها .. معقولة نحرجه .. ده كبييير .. وبصراحة " لعيييب " .. سجّد الكل ، وشغلنا بمليون حاجة ، وسقى الدفاع حاجة أصفرة ، فدخلوا في بعض بدل مايقفوا قصاد المهاجم .. اتلخبط الجون .. ضرب لخمة .. جات له الكورة معرفش يمسكها .. ومش زعلان البيه الخايب .. ماهو مش اى حد اللي شاط .. ده المعلم الكبير.
شوفوا بقى أكيد فيه حد فينا حمار .. ماهو مش ممكن كبار فقهاء القانون يكونوا مش فاهمين قانون ، وبناء عليه قالوا قانون العزل أمر واجب ، وإحالته من اللجنة الرئاسية للدستورية العليا مخالف مخالفة لا تخفى على طالب في أولى حقوق .. وقالوها صراحة: تحايل صارخ على القانون.. ومنهم من قال بألم شديد : عيب اللي بيحصل ده .. إهانة في حق القضاء المصري العظيم ان قضاة ومستشارين كبار يسمعوا الكلام وينفذوا الأوامر .. والكل كان منتظر الفرج من الدستورية العليا فيما يخص الفريق شفيق .. قامت المحكمة قالت لك شفيق يستمر والبرلمان يتحل .. نص العمى ولا العمى كله .. متعرفش بقى العليا ان العمى كله كان في استمرار شفيق .. صحيح البرلمان انحل وده ريّح ناس كتير .. لكن ادي دقني اهى ان ما رجع الحزب الوطني تاني واخد الاغلبية وحيرجع زمن مبارك أسوأ مما كان .. وخلي مرسي يحلم براحته .. وحياة أمي ورحمتها .. شفيق هو اللي جي .. لأ وإيه .. بالصناديق!!!
وحنقعد نغني : لا هى باظت ولا خربت ولا جابت جاز لا مؤاخذة .. دي عيشة ظريفة جدا .. ولا فتنة انضرمت ولا حد بيشتكي لحظة .. ماشية والاشية معدن .. عايشين في حرية .. زمن القيود اختفى .. اتحدى لو واحد يوم انضرب بالقفا .. والناس بتختشي ولا حد بيرتشي .. الله على الحياة .. بقى لونها شفتشي .. ده احنا لا صوتنا اتنبح.. ولا في مالطة بندن.
كله راجع تاني .. وبأسرع مما تتصوروا.. محدش يستبعد اللواء حسن عبد الرحمن بتاع أمن الدولة يبقى وزير الداخلية .. والعادلي بعد البراءة في الاستئناف يبقى مستشار امني ماحصلش .. وجمال مبارك بعد ما يخرج من قضية البورصة يبقى وزير مالية .. وعلاء أخوه وزير سياحة او اسكان او اى هباب ازرق .. ومبارك الله يرحمه كان راجل طيب واحنا اللي ظلمناه وجينا عليه وجرحناه .. أصلنا ولاد كلب مالناش في الطيب نصيب .. وسلم لي على الكوسة والزلابية والبطيخ والكنتالوب وقرع العسل .. وغنوا معايا غنوا .. وقولوا ورايا قولوا .. كتر يارب في اعيادنا .. واطرح فيها البركة وزيد .. جانا شفيق اهو جانا شفيق!!

ونرجع لمرجوعنا .. الماتش إياه .. واحد – صفر .. لأ .. واحد ايه .. قول اتنين تلاتة عشرة .. والماتش لسه ماخلصش والحكم ماصفرش .. ولسه فيه وقت بدل ضايع .. يعني فيه أمل .. بس عشرة صفر .. حنقدر نعوّضهم؟ ازاى والجمهور نفسه مش عايز يشجع؟ .. جمهور زهقان ومحبط وقرفان " طالع ميتين أمه " .. ادي اللي اخدناه من الثورة .. خد لك جنب وسيب الكبير يحكم مادام انت معرفتش تحكم .. كانت الكورة في ايدك .. سيبتها ليه .. جي دلوقتي تعيط .. براحتك ع الأخر.. عيّط واملى البحر اكتر ماهو مليان .. وسلم لي ع البدنجان.