تحيا جمهورية « مرسي » العربية!!!

صحيح خبطتين في الراس توجع .. لسه قاعد أجيبها يمين شمال .. وفوق وتحت.. واضرب أخماس في أسداس عشان افهم واستوعب القسم الجديد العجيب المريب اللي أقسمه مدير المخابرات أمام الرئيس مرسي .. ألاقي د - عبد الأخر حماد مفتي الجماعة الإسلامية بيطلع لنا بفتوى مضحكة ومُبكية في الوقت نفسه .. وهى أن تحية العلم حرام ، وكذلك النشيد الوطني .. فالوقوف أمام العلم فيه تعظيم له .. والعظمة لا تكون إلا لله .. وأيضا النشيد الوطني فيه موسيقى ونغم .. والموسيقى حرام شرعا وقانونا.. وشافعي ومالكي وابو حنيفة .. وابو حنبل كمان.

يا ليلة سوخة يا ولاد .. هى المسالة وصلت للدرجة دي ؟ .. طيب على كده بقى إن كان اللي بيسمع وبيغني " بلادي بلادي بلادي لك حبي وفؤادي " قد ارتكب جرما محرّما واضحا بيّنا لا يقبل الجدال .. فما الحكم في من يسمع " أهواك " لعبد الحليم ، و" انت عمري " لام كلثوم .. و" زينة زينة " لفريد الأطرش ؟ .. الحكم أكيد حيكون الإعدام شنقا أو رميا بالرصاص .. او بإحدى الوسيلتين .. أيهما أكثر عذابا وإيلاما للمحكوم عليه.
.. بقى معقولة النشيد الوطني بتاع زمان : " والله زمان يا سلاحي اشتقت لك في كفاحي ..إنده وقول انا صاحي .. يا حرب والله زمان ".. ولا .. " بلادي بلادي " دلوقتي .. غير جائز شرعا اننا نغنيه واحنا واقفين في طابور الصباح بالمدرسة .. نوقّر ونحيي علم مصر اللي هو حتة عصاية وحتة قماش لا يجوز تعظيمه بحال من الأحوال .. أمال الضابط لمّا يعظّم للرتبة الأعلى منه نقول عليه إيه ؟ .. معلش سامحوني .. ما المسألة بقت هبل في هبل.. طيب لما وزير الدفاع بيعظّم للرئيس مرسي حرام ولا حلال ؟ ..
لأ .. هنا بقى نقف ونلم لساننا ونحطه في " بُقنا ".. لحد مرسي .. وجزمة قديمة على قفا اللي يتكلم ويعترض .. التعظيم لمرسي حلال وجائز شرعا.. والوقوف والتعظيم لعلم مصر حرام.. " اوعى حد يفتكرني بتكلم بجد ومنطقية .. انا بس بجاري المتخلفين عقليا في فتواهم " .. واللي يفقع مراراتك أن دار الإفتاء بجلالة قدرها تستهيف فيها هى كمان ، وترد على الشيخ المعتوه صاحب الفتوى ، وتؤكد أن تحية العلم والنشيد الوطني لا حرمة فيها ولا فيه .. بدلا من أن تتجاهل هذا العته والخبل وتعطيه ظهرها .. لأ .. بترد.. كأن الافندي بيقول كلام ممكن نناقشه.
.. والله العظيم قربت أتجنن.. هو حد ضحك على صاحب الفتوى وقال له أن نشيد مصر الوطني: " خليني جنبك خليني.. في حضن قلبك خليني .. وسيني احلم سيبني .. ياريت زماني ميصحنيش " او " ياحبيب امبارح وحبيب دلوقتي .. يا حبيبي لبكره ولأخر وقتي " .. وان نجوى فؤاد كانت بترقص عليه .. ولما كبرت جبنا دينا .. ده ايه التخلف العقلي ده ؟ .. خلاص مفيش حاجة تستاهل نشغل نفسنا بيها .. نقوم نتكلم اى كلام وننشغل بفتوى لواحد أهبل ونعملها حكاية ورواية ونناقشها كأنها بجد حاجة جديرة بأن تُناقش؟! .. ارحمنا يارب برحمتك.
ارجع لمرسي وحكاية القسم بتاع مدير المخابرات الجديد بأن يكون ولاؤه كاملا لرئيس الدولة .. رحت أبحث عن معنى كلمة الولاء والانتماء.. فوجدت - دون الدخول في أمور معقدة - إجماع شبه كامل على أن الانتماء يكون لكيان معنوي .. للوطن مثلا في أعلى مراتب هذا الانتماء ، أما الولاء فيكون للأشخاص ولو على حساب الوطن .. فعندما يقسم مدير المخابرات بأن يكون ولاؤه الكامل لرئيس الجمهورية .. فمعنى ذلك ويقينا انه سيكون معاه في الغلط والصح .
حيكون تحت طوعه في اى أمر يصدر إليه .. لو احنا مثلا اختلفنا مع الرئيس - وده وارد وحادث الآن - وراح عم مرسي غمز بعنيه لمدير المخابرات : " لم الدور وخلّص الليلة " حتخلص في ساعتين .. ما الراجل حلف قدامنا كلنا انه يسمع كلام الرئيس ولا يجادله.. وشوية شوية حيتغير القسم العام بتاع الوزراء ، بما فيهم وزير الدفاع طبعا .. ودي المصيبة السودا.. وممكن يكون على هذا النحو : " اقسم بالله العظيم أن أحافظ مخلصا على امن الدولة وسلامة أراضيها .. وان أكون كرباجا في يد الرئيس اليمين .. وشومة في ايده الشمال .. وان اصد عنه اى كلب ابن كلب لسانه طويل وعايز قطعه .. وأوافقه في كل ما يقول .. غلط او صح .. واللي يرشه بالميه نرش أمه بالنار .. واللي مش عاجبه حينضرب بالجزمة .. وحنخليه يقول بجد .. ولا يوم من أيامك يا مبارك.. والله على ما أقول شهيد ".
إيه رأيكم بقى في القسم ده ؟ .. وبالمرة مادام الولاء حيكون كاملا غير منقوص لرئيس الجمهورية .. يبقى يصدر قرار بقانون بتغيير اسم البلد من جمهورية " مصر" العربية.. إلى جمهورية " مرسي " العربية.. وساعتها الراجل بتاع " الفتة " قصدي الفتوى ، حيقول لك ان تحية العلم حلال وبنت حلال مصفّية كمان .. بشرط انه تكون صورة " مرسي " وبالألوان الطبيعية علي العلم.. وممكن في الحالة دي تبقى الموسيقى برضه حلال ، خاصة لو صاحبها صوت شادية الجميل الرقيق وهى بتغني النشيد الوطني المناسب للمرحلة الجديدة : " خطّابك كتير وقالولي يستاهلوا الدهب واللولي .. من بين الحبايب واحد .. بتشاوري عليه وتقولي .. حبيبي أهوه .. خطيبي اهو.. ومفيش غيره ليا .. ومفيش غيرى له .. أهو .. حبيبي أهو .. خطيبي أهو" .. ومن الجائز شرعا اننا نعمل أعلام صغيرة عليها صور عيال مرسي ونوزعها في أعياد ميلادهم على المدارس والكليات اللي كانوا فيها واتخرجوا منها ونغني كلنا : من كام ليلة من كام يوم .. واحنا بنستنى " يا ولاد مرسي " دا اليوم .. شمع الفرح علينا منوّر ونسينا م الفرحة النوم.. من كام ليلة من كام يوم واحنا بنستنى دا اليوم ".!

... والله كل شىء في البلد جايز .. ما احنا بقينا في زمن العجايب .. بس لو وصل الحال بينا للدرجة دي حيكون النشيد الوطني بجد لجموع الشعب الغلبان اللي طالع عين اللي خلفوه : " كتاب حياتي ياعين .. ماشوفت زيه كتاب .. الفرح فيه ساعتين والباقي كله عذاب ".. والحمد لله ان حسن الاسمر مات .. وإلا كان الشيخ صاحب فتوى تحية العلم اصدر فتوى تانية بجواز نفخ وسحل الاسمر انه غنى هذه الأغنية .. ولم يضع في اعتباره لحظتها أنها ممكن تكون النشيد الوطني الأكثر صدقا عما وصل إليه الحال في جمهورية " مرسي " العربية.. وان يستغلها الشعب ابن اللئيمة للتعبير عن غلبه وقهره في زمن الإخوان.!!