الله يخرب بيتك ي سيادة الشفيق

امبارح لحد الساعة اتنين بعد نص الليل قاعد قصاد التليفزيون أتفرج .. حمدين صباحي عالي اوي في الحتة الفلانية ، وابو الفتوح في الحتة العلانية ، وشفيق مكتسح في مصر الجديدة ، ومرسي مش عارف فين ، وموسى باي باي ياحلوة .. الانتخابات قدام العالم كله نزيهة ، والصندوق هو الحكم وربنا يولي من يصلح " قالها أكثر من واحد " .. وقمت الساعة 11 قبل صلاة الجمعة .. فيصدمني شريط أسفل الشاشة مكتوب عليه " بعد فرز 90 % من الصناديق .. الإعادة بين شفيق ومرسي " .. مش قادر أوصف لك إحساسي في اللحظة دي .. شعور بالغم والإحباط غير مسبوق .. وافتكرت شهداء الثورة ، فداريت وشي عنهم ، وكأنهم ينظرون لي بعتاب شديد : شفيق ؟ .. متنا وضحينا بعمرنا وفي الأخر يجي شفيق .. انتوا أكيد بتهزروا .. أو شاربين حاجة .. يا خسارة عمرنا اللي راح ويا خسارة عشم أمنا ان استشهادنا حيكون له تمن .. يا خسارة الـ 18 يوم اللي خرج فيها أنبل شباب وبنات البلد .. يا خسارة دموع الفرحة وعمر سليمان بيعلن تنحي الرئيس .. يا خسارة أعلامك يا مصر اللي رفعناها واحنا بنرقص ونحضن بعضنا .. واحنا فاكرين اننا بنودع 30 سنة كانت أسود من قرن الخروب عشان في الأخر يجي شفيق!!!
وفين حمدين وابو الفتوح بتوع الميدان ..الثوريين على حق ؟ .. كل واحد طمع في الكرسي والمنصب الرفيع وضربوا بعض .. كسّروا بعض .. لساننا " ادلدل " واحنا نقولهم : اتحدوا .. واحد فيكم يتنازل للتاني .. انتوا أمل الثورة وفكركم متقارب .. حتفرق كتير معاكم لو أصوات الاتنين راحت لواحد .. لأ .. العند الغبي .. وكل واحد فاكر انه مكتسح ، وانه حيبقى الرئيس .. أتحداهم الاتنين " حمدين وابو الفتوح " انهم كانوا بيفكروا في مصر .. ملعون أبو مصر قصاد إني أبقى رئيسها .. .. وساعتها يحلّها الحلال .. نراجع نفسنا تاني ونقول " بقين " حلوين .. وحمدين يقولك : مش حادخل قصر الرئاسة إلا وايدي في ايد أمهات الشهداء .. وابو الفتوح يقول لك : دم اللي راحوا مش حيروح بالساهل .. كلام فارغ وقذر ، وكل واحد فيهم مش عايز غير مصلحته .. والنتيجة اهه .. هما الاتنين بره ... ويستاهلوا.

احنا ما عملناش ثورة وصبحنا الفساد اللي عمله فينا مبارك اتغير.. احنا عملنا ثورة عشان نجيب نظام يصلح الفساد اللي عمله فينا مبارك

واذا كان مبارك خلق من قطاع كبير منا واطيين وشحاتين وجبنا واندال.. فمش ناقص نجيب شفيق يخلق منا معاتيه،  شفيق مش حينجح الا بالرشوة والتزوير

إنصافاً -للحمير

مالذي يجعل الحمار حماراً؟
إذا كان الإنسان كلما يكبر تكبر أذناه ويزداد علماً ويخف سمعاً، فلماذا لا نقدر الحمار الذي يولد بأذنين طويلتين وسمع حاد
  الحمار كونه صديق الإنسان منذ 6000 عام وإلى الآن لنحلل لماذا ارتبطت به صفة الغباء وهو معاكس تماما لها لا نجد إلا في مقاييس البشر الظالمة أن ذلك ناتج عن صفات ملازمة له؛  فالمتعامل مع الحمير يجد أن من أكثر الصفات التي يعرفون بها هي الصبر..  إذ يتمتع الحمار بقدرة تحمل تفوق غيره من أنواع الحيوانات… وأظن أن هنا مربط الحمار عفواً مربط الفرس.. فيبدو أن قضية الصبر هذه ربما هي أكثر ما تجعل الحمار حماراً .. وهذه الصفة هي التي تطلق على المجتهد في عمله "حمار شغل" والتي تربط بالشخص الذي يعمل دون توقف ولا يقول "لا" لأي عمل يطلب منه .. ولا يشتكي.. ولا يتحدث عن حجم العمل المناط به ولا الصعوبات التي يواجهها ولا الحمولات التي على ظهره.. يعمل بصمت حتى بدون نهيق..
ومن الأشياء التي تؤهله ليكون حماراً بإمتياز أنه لا ينتهز الفرص فلا يترك المكان الذي ألفه ولا يخون صاحبه إن نسي يوماً أن يربطه بالشجرة بل يعود إلى صاحبه أو حظيرته!
وربما لأنه يعيش إلى عمر الـ 40 ثم يموت، وهذا يعني أنه ما إن يصل سن العقل والنصج حتى يموت!
للحفاظ على الحمير:
لا ننكر أن هناك من أنصف الحمير، فمن ناحية الحقوق الجسدية، قامت مدينة بلاكبول الساحلية شمال غربي إنكلترا بتطبيق قواعد صارمة للحفاظ على الحمير. إحداها ألا تتجاوز أيام عمل الحمار الستة أيام في الأسبوع ما بين العاشرة صباحاً وحتى السابعة مساء تتخللها ساعة راحة يومياً لتناول وجبة الغذاء، مع أجراء اختبارات صحية إلزامية قبل بدء موسم الصيف.. فما رأيكم في الانتقال إلى مدينة بلاكبول الساحلية شمال غربي إنكلترا والعمل فيها؟..
أما عن الحقوق الفكرية للحمار، فقد لاقت الحمير بعض الإنصاف حين سميت إحدى الجمعيات في المغرب اسمها باسمهم دلالة على نباهته أكثر من البشر وهي جمعية أصدقاء الحمير المغربية وجمعية الحمير المصرية ذات البعد الحقوقي والإنساني، كما أن الحمار شعار لحزب الديمقراطي الأمريكي كناية عن الصبر.
وفي التقويم الجمهوري النفسي يعتبر يوم 6 أكتوبر في كل عام يوم الحمار
 ولنعرف أننا لازلنا بحاجة إلى الحمار، وإن كنا في عصر تدفق المعلومات، فقد تدفقت الحمير وفق خبر نشر مؤخراً في 21/2/2009 لحل أزمة المياه في عدن، حيث أصبحت تشاهد الحمير لجلب المياه من مناطق أخرى بعد انقطاعها.
وأخيراً أتساءل من الحمار؟..
- الذي يتعاملون مع من ينقضون العهود ويوقعون معهم الاتفاقيات.. أم الحمار الذي يتعلم من المرة الأولى..
- الذين أتاهم كتاب الله وسنة رسوله- صلى الله عليه وسلم- فيجادلون ويفترون ويفضلون القوانين الموضوعة على القوانين الإلهية؟
- الذين يتبعون خطوات الشياطين أم الحمار الذي يرتفع نهيقه كلما رأى الشياطين؟
- الذي صدأ سلاحهم، فلم يعد يستخدمونه، أم الحمار الذي يستخدم أرجله الخلفية للرفس حين يهدد أمنه أحد؟
- من يدخن التبغ والمخدرات أم الحمار الذي يأكل الأعشاب والنباتات، فإذا اقترب من شجرة التبغ لم يأكل منها؟
وأختم مقالي بهذا البيت من الشعر
قوم إذا شبه الحمار بهم     قال: لم بهم أظلم

إسرائيل على الحدود .. وابقوا قابلوني لو المجلس مشي!

يارب أكون غلطان ومش حازعل لو حد قال عني غبي ولا أفهم في السياسة .. بل بالعكس أتمنى أطلع غبي وحمار كمان في السياسة وسعد الصغير

أوعى مني بشؤونها .
المهم م الأخر .. المجلس العسكري مش ناوي يمشي ومفيش انتخابات رئاسية والاضطرابات حتكتر اوي اليومين الجايين وفيه ناس كتير حتموت .. والفوضى حتعم أرجاء المحروسة اللي مبقتش محروسة من حد .. الكل قاعد يحسبها ومش عايز حسبته تخرب او تبوظ " من البوظان " .. محدش بيحب مصر إلا شوية شباب لسه قلوبهم نظيفة ومش طمعانين لا في سلطة ولا يحزنون .. إنما مثلا اللي مرشحين نفسهم للرئاسة باستثناء واحد أو اتنين على الأكثر مفيش حاجة تهمهم غير مصلحتهم .. ولسه بنفس اللهجة العفشة بتاعت نستنكر ونشجب وندين بشدة.. كسبنا صلاة النبي .. الناس  قاعدة تموت زي الفراخ تحت عين وبصر المجلس العسكري والداخلية .. واللواء ممدوح شاهين في مؤتمر صحفي " لامم " شوية مقاطيع " سقيّفة " : احنا مش ممكن نقتل مصري أبدا .. مش في عقيدتنا.
هو عنده حق - اقصد اللواء شاهين - لأنه يراهن على " آفة حارتنا النسيان " .. مفيش بقى صحفى " دكر" ولا صحفية " راجل " ترد وتقوله : امال اللي ماتوا في ماسبيرو مين قتلهم .. واللي ماتوا في مجلس الوزراء واللي ماتوا في بور سعيد واللي واللي .. لا كله حط جزمة في بقه وسكت .. لأ .. ومش بس سكت .. كمان " بيسقف " .. يا خي " ... " .. ولا بلاش .. عيب .. لا تقولوا عليا قليل الأدب ، مع ان قلة الأدب هنا فرض عين واروح انا فين جنب قلة الأدب الحقيقية اللي قاعدين نشوفها من ده وده وده ؟
عموما من ساعة ما صدر حكم قضائي بمنع تصدير الغاز لإسرائيل وانا الفار بيلعب في عبي .. صحيح انه حكم المفروض اني افرح بيه كمصري ، لكن الفار ابن الكلب مش عايز يبطل تنطيط ، حيث تداعيات العملية دي ونتائجها مش حتكون سهلة أبدا .. واهو إسرائيل بجلالة قدرها حشدت قواتها على الحدود المصرية واستدعت الاحتياطي بتاعها كمان .. وانا واثق 100% انها حركة " قرعة " .. يعني لا فيه حرب ولا هباب ازرق .. لكن إديني عقلك دلوقتي وخده تاني .. لو إسرائيل فعلا بتحشد قواتها وبتبيّن العين الحمرا ، واحنا قاعدين ناكل في بعض ، وكل واحد مش همه غير نفسه .. مين بقى اللي خايف ع البلد ؟ ..
هه ؟ .. مين بقى اللي لو حب يمشي حنبوس رجليه ونقوله ونبي متمشيش .. حتسيبنا لمين دلوقتي .. لازم مؤسسسة عسكرية شديدة تخوف إسرائيل .. ولازم كمان رئيس عسكري " فلة " يزغر لها بعينه فتخاف وتكش .. وبناء عليه ونزولا على رغبة الشعب المصري الأجهل من دابة .. قررنا نحن أعضاء المجلس العسكري ومستشاريه من الإعلاميين المطبّلتية ، والصحفيين الأراجوزات ، الاستمرار في حكم البلاد وتأجيل الانتخابات الرئاسية إلى أن يقضي الله بأمر كان مفعولا .. يعني نسيب مصر ياجدعان تضيع ؟ .. لأ طبعا .. أصلكوا متعرفوش إسرائيل .. دي بنت جزمة .. احنا اللي عارفينها كويس .. تتمسكن لحد ما تتمكن وفين يوجعك.. ودي لا ينفع معاها حمدين صباحي ولا ابو الفتوح ولا حتى شفيق يا راجل ولا سي عمرو موسى .. أمال مين يا عم المجلس؟ .. يرد : بلاش نقاطع .. لكل حدث حديث .. حد عارف بكره حيحصل ايه؟ المهم عايز مليونية الجمعة الجاية تهتف للمجلس العسكري تحت شعار " متسبناش متسبناش .. غير العسكر مينفعناش " ويا مشير يا مشير احنا معاك في التحرير" وياعنان يا عنان حبك في قلبي زاد وبان " .. وتجاوبا مع هذه الإرادة الشعبية الطاغية ، وحرصا منا جميعا على مصلحة الأمة ومصر .. مش وقته خالص نتخانق على الكعكة ، احسن إسرائيل " بنت الجزمة " تستغل الموقف وتلهفها كلها لوحدها .. ومحدش يقدر يوقّفها عند حدها غيرنا احنا ..عشرة عمر بقى واللي ربى غير اللي اشترى ع الجاهز.. سيبونا احنا نتصرف وسك على موضوع الانتخابات دلوقتي .. مصلحة مصر أهم.
... عارفين يا عم المجلس مصلحة مصر أهم .. احشد انت قواتك واستعد لحماية البلاد وسيبك بقى من عك الانتخابات ومجلس الشعب والإخوان والسلفيين .. ارمي الجمل بما حمل على قفا واحد تاني وشوف شغلك صح .. دافع عن البلد عشان نشيلك فوق راسنا ونفتخر ان عندنا جيش قوي ومحترم .. ارمي أطماعك خلف ظهرك الآن .. البلد مهددة ولابد لها من رئيس قوي وشديد.. إلا إذا كانت المسألة كلها تمثيلية خايبة .. الغرض الوحيد منها الاستمرار في حكم البلاد وننشغل كلنا بالخطر الأهم .. إسرائيل ع الحدود .. و67 تلّوح بأيامها السودا من بعيد.. و73 ، كان حلم وراح ، انساه وارتاح .. واللي حيفتح بقه بغير كده حياخد بالقديمة .. دي مصلحة مصر يا جدعان .. ويا للا يا مغنواتية نبث الهمة تاني في نفوسالشعب المصري .. ويا اهلا بالمعارك يا بخت من يشارك بنارها نستبارك ونرجع منصورين .. ويا حبايب بالسلامة رحتم ورجعتوا لنا بألف سلامة .. وسلم لي ع الباتنجان .. وعلى قلبكم لـ " طالون " واللي مش عاجبه ميبقاش مصري .. لا شرب من نيلها ولا يعرف يغني لها .. وأمر من المجلس العسكري لوزير الإعلام : من دلوقتي لحد مانشوف الدنيا واخدانا على فين .. مش عايزين غير أغنية واحدة على مدار الـ 24 ساعة .. وعشان محدش من الجهلة يفتكر ان الإطاحة بمبارك هى نهاية الكون .. نعيد ونكرر .. هى أغنية واحدة مفيش غيرها وعلى مدار الساعة عشان الحمار يفهم : راجعين بقوة السلاح!!

انتوا اللي مالكوش في الفلة نصيب

المجلس نجح بمساعدة التيارات السياسية انه يفضل في الحكم، وهو عازم على البقاء في الحكم، حكاية انه خايف ملفاته تتفتح والكلام ده، ده كان زمان...... دلوقت هو عايز يفضل في الحكم.. انتوا عارفين كرسي عرش مصر عليه عسل وغرا الاتنين مع بعض، وكمان اتورط في دم، يعني لو خرج فيها رقبته.. يخرج ليه بقى؟ لا لازم يفضل

طبعا التيارات السياسية ساعدته انه يحبط الموجة التانية من الثورة وما يمشيش، لكن هو مش حمار بقى زي الراجل اللي فات، او بالاحرى، اللي بيديله المعونة مش حمار وهو بيسمع الكلام مش عندي زي الراجل اللي فات، هو عارف انه خلاص اتكره، واذا كانت دي فشلت عشان ما حدش لقي بسرعة بديل للمجلس العسكري وراح شاقطنا بموضوع الاسنتخابات ده، فهو خلاص.. ماحدش بقى طايقه، وهو عارف ان ماحدش بقى طايقه، والناس مرقدة له، واذا ما عرفوش يمشوه المرة دي حيمشوه المرة الجاية.. طب وهو حيستنى المرة الجاية؟ خمس عيال بآلي وخلص الليلة

خمس عيال بآلي اغلبهم - ان لم يكن كلهم - عيال من المعاتيه اللي بيسلموا ودنهم لبتوع التحريات العسكرية.. ثوار التحريات العسكرية الاكثر مزايدة على الاطلاق... مش حتقدر تغمض عينيك

ايه الدليل على اللي انا باقوله... الدليل (بخلاف ان بتوع التحريات العسكرية هم بالتحديد اللي عمالين يتكلموا عن السلاح وليبيا والكلام الفارغ ده) هو المجالس اللي هو عمال يخترع لنا فيها

مجلس الشعب بدون صلاحيات... طب كده مجلس الشعب ممكن يتخانق معاه، قوم لما يتخانق معاه الناس اللي راحت انتخبت مجلس الشعب ما حتصدق تنزل له: ارحل يا عم.. احنا مش قلنا لك كده المرة اللي فاتت؟ طب خلاص، نجيب له مواطنين شرفاء في مجلس استشاري يتخانقوا معاه، وبما ان مجلس الشعب الاندال هم اللي حصلوا فيه على الاغلبية فما حيصدقوا يفشوا غلهم في حد تاني غير العسكري احسن العسكري ده بيضرب جامد.. حلوة حكاية المجلس الاشتشاري دي نمسك في خناقة ويمسك في خناقنا بالادب.. مجلس الوزرا اسمه ايه ده اللواء الجديد.. عبد الحق باين؟ فيه شخصما كتشيت كده ظهر في الافاق قال: صلاحيات الجنزوري مطلقة.... زي صلاحيات شرف بالظبط.. واهو الحاج ابو صلاحيات ده، اسم الله على مقامه حيفضل مشغول بالبت صلاحيات يشورها ويجهزها عشان احنا نتخانق معاه على الداخلية والاسعار وسوء الاحوال المعيشية والمحاكمات وخلافه.. والمجلس العسكري بيحرك كل الاطراف من خلف ستار لانه عارف ان ماحدش طايقه ولازم يغور من وشنا الساعة دي، فهو حيحط برقع بس... لكن برضه، ليه نسيب حاجة للظروف؟ ماهم الناس دي اصلها تلف تلف وتروح ماسكة فينا وهاتك يا شتيمة فيك يا مجلس يا عسكري، نقولهم طب نجيب لكم عنان يقولوا لنا إلأ إلأ.. نقول لهم طب اهو الجنزوري يقولوا لنا إلأ إلأ.. امشي امشي امشي... وانا مش عايز امشي.. لو اتزنقت حاعملها حرب اهلية بقى واللي يحصل يحصل.. بشكل محدود، زي عمليات مبارك المحدودة بخصوص الارهاب وزي عمليات المجلس العسكري نفسه المحدودة بخصوص الكنائس والفتن الطائفية، قوم الناس تقول: في عرضك خليك قاعد

وبهذا يا اصدقائي الصغار، اذا ما نفعتش الخناقة السياسية تنفع الخناقة ام خمسة آلي المهم يسيبونا قاعدين والنبي والنبي والنبي.. اصل الكرسي حلو وهزاز

وبرضه نحفظ خط الرجعة ونقول ينكن تطلع تخاريف غاز... بس برضه اهو الواحد يعمل فضيحة شبه الفضيحة بتاعة المرة اللي فاتت قوم لو عقلهم وزهم على الكلام ده يعرفوا ان احنا كاشفينهم وحافظينهم وعاجنينهم وخابزينهم ومش واكلين من الاعيبهم.. حسكم عينكم تلعبوا باليح... اوعى اوعى.. مافيش لعب باليح احسن نلسعك ونجيب لك واوا.. وحنقفشك برضه وانت مستخبي ورا الستارة.. بخ

ومافيش عيال عبيطة حتسمع كلام التحريات العسكرية، هم عبط اه.. بس من كتر طبيتهم، وبيحبوا البلد اكتر منك يا طنطاوي واكتر من امهاتهم كمان

مافيش حد فيهم عايز لبلده حرب اهليه.. ولا حد فيهم عايز لبلده انقلاب عسكري ولا انشقاق مسلح... احنا شعب فلة.. انتوا اللي مالكوش في الفلة نصيب